Төсек жабдықтары ескі, емі ақылы: Алматы тұрғыны №7 ауруханаға шағымданды
АЛМАТЫ. KAZINFORM – Алматы тұрғыны қала әкімі Ерболат Досаевтан № 7 қалалық клиникалық ауруханаға шағымданып, тексеру жүргізуін сұрады.
Ерболат Досаевтың Наурызбай ауданы тұрғындарымен кездесуі барысында алматылық әйел №7 қалалық клиникалық ауруханасының төсек жабдықтары көне, кейбір қызметі ақылы екенін айтты.
«Қалқамандағы № 7 ауруханаға қатысты өтінішім бар. Кеңес заманынан бері жұмыс істеп келе жатқан аурухананың палаталары ескі, төсек жабдықтары тозып кеткен. Соған бір жаңашырлық танытып, тексеру жүргізсеңіз. Сондай-ақ көп ем-домы ақылы»,- дейді аудан тұрғыны.
Алматы қалалық денсаулық сақтау басқармасының басшысы Иран Шаметековтың айтуынша, ауруханаға жөндеу жұмыстарын жүргізу жоспарда.
«Осы жылдың сәуір айында №7 қалалық клиникалық ауруханасына жөндеу жұмыстарын жүргізу үшін жобалық-сметалық құжаттама әзір болады. Сосын ауруханада жөндеу жұмыстары басталады. Емдеу мекемесінде қызмет тегін көрсетіледі. Егер қызмет МӘМС аясындағы тегін медициналық көмекке жатпаса, онда ақылы болады»,- деп жауап берді басқарма басшысы.
