Трамп: Ираннан мұнай сатып алатындарға санкция салынады
АСТАНА. KAZINFORM – АҚШ президенті Дональд Трамп Ираннан мұнай немесе мұнай өнімдерін сатып алатын елдерге немесе жеке тұлғаларға АҚШ-пен бизнес жүргізуге рұқсат етілмейтінін ескертті, деп хабарлайды Kazinform меншікті тілшісі.
- Иранның мұнай немесе мұнай-химия өнімдерін сатып алуды дереу тоқтату керек! Ираннан кез келген көлемде мұнай немесе мұнай-химия өнімдерін сатып алған кез келген ел немесе жеке тұлға дереу екінші реттік санкцияға ұшырайды. Оларға Құрама Штаттармен қандай да бір жолмен бизнес жасауға рұқсат етілмейді, - деп хабарлады Дональд Трамп Truth әлеуметтік желісінде.
Трамптың түсініктемелері Ираннан күніне 1 млн баррельден астам мұнай импорттайтын Қытайға бағытталғаны анық, деп хабарлады Rapidan Energy консалтингтік фирмасының бас директоры Скотт Моделл CNBC-ге.
Президенттің мәлімдемелері «әкімшіліктің Иранмен жаңа келісімге қол жеткізу жөніндегі ұмтылысының өзгергенін білдірмейді, керісінше, Трамптың күш қолдану арқылы келіссөз жүргізуге деген сенімін көрсетеді» - деп білдірді пікірін Скотт Моделл.
Бұған дейін АҚШ Иран мен Қытай компанияларына санкция салғанын жазған болатынбыз.
