Трамп президенттік мерзімі аяқталғанша Куба мәселесін шешкісі келетінін айтты
АСТАНА. KAZINFORM – АҚШ президенті Дональд Трамп Ақ үйдегі өкілеттік мерзімі аяқталғанға дейін Куба мәселесін шешуді қалайтынын мәлімдеді. Сондай-ақ ол арал мемлекетіне қарсы әскери күш қолдану мүмкіндігін де қарастыратынын айтты, деп хабарлайды Anadolu агенттігі.
Трамп бұл туралы Salem News Channel телеарнасына берген сұхбатында айтты. Одан президенттік мерзімі аяқталғанға дейін Кубаға қарсы әскери операция жүргізуге рұқсат бере ме деп сұраған.
– Мен қызметімнен кетпей тұрып Куба мәселесін шешкім келеді, – деді АҚШ президенті.
Ол Вашингтонның аралдағы жағдайды жіті бақылап отырғанын атап өтті.
– Біз ондағы жағдайды мұқият қадағалап отырмыз. Елдің жағдайы өте нашар. Негізінен, бұл – сәтсіздікке ұшыраған мемлекет, – деді Трамп.
Сондай-ақ ол ата-анасы Кубадан шыққан АҚШ Мемлекеттік хатшысы Марко Рубионы мақтады. Трамптың айтуынша, Рубио да Куба мәселесін шешуге мүдделі.
– Мен мұны сол елден Америкаға келіп, кезінде қатты қиындық көрген кубалықтардың игілігі үшін жасағым келеді, – деді ол.
АҚШ президенті Кубаға қарсы әскери күш қолдану мүмкіндігін де жоққа шығармады.
Айта кетейік, АҚШ-тың қысымымен Куба тағы да жарықсыз қалғанын жаздық.
Сондай-ақ Вашингтон Кубаға қарсы санкцияларын кеңейтті. Бұл президент Мигель Диас-Канел мен Рауль Кастроның отбасы мүшелеріне әсер етті.
