Трамптың бұрынғы кеңесшісі Джон Болтон қылмыстық жауапкершілікке тартылды

АСТАНА. KAZINFORM — Дональд Трамптың бірінші президенттігі кезінде ұлттық қауіпсіздік жөніндегі кеңесшісі болған, кейінірек Ақ үй басшысын қатты сынаған Джон Болтон құпия ақпаратты заңсыз бөліскені үшін айыпталды. Бұл туралы ВВС агенттігі жазды. 

Ол ФБР-дің бұрынғы директоры Джеймс Коми мен Нью-Йорк бас прокуроры Летития Джеймстен кейін қылмыстық жауапкершілікке тартылған америкалық көшбасшының үшінші қарсыласы болды. Болтонның кінәсі дәлелденсе, ұзақ мерзімге бас бостандығынан айырылуы мүмкін.

Тамыз айында ФБР агенттері саясаткердің құпия ақпаратпен жұмыс істеуіне қатысты тергеу аясында оның үйі мен кеңсесіне тексеру жүргізді.

Болтон кінәсін мойындамады. Оның адвокаты Эбби Лоуэлл Болтон құжаттарды дұрыс жүргізгенін айтты. Ол жұма күні ресми түрде билікке беріледі.

Бейсенбіде АҚШ әділет министрлігі істі Мэриленд штатындағы алқабилер алқасына ұсынды. Олар Болтонды айыптау үшін себеп те, дәлел де жеткілікті деп келісті.

26 беттік айыптау қорытындысына сәйкес, Болтонға ұлттық қорғаныстың ақпаратын таратқаны үшін барлығы 8 айып және оны заңсыз сақтағаны үшін 10 айып тағылды.

Прокурорлар оны жеке электрондық поштаны және басқа хабар алмасу қызметтерін пайдаланып АҚШ ұлттық қорғанысы туралы өте құпия ақпаратты заңсыз таратты деп айыптайды.

— Бұл құжаттар болашақ шабуылдар, сыртқы қарсыластар және сыртқы саяси байланыстар туралы барлау мәліметтерін көрсетті, — делінген Әділет департаментінің құжатында.

Қорытындыда Джон Болтон құпия құжаттарды электронды пошта арқылы аты-жөні аталмаған, бірақ американдық БАҚ өкілдерінің айтуынша, оның әйелі мен қызы болуы мүмкін екі «рұқсат етілмеген адамға» жібергені айтылған.

— Әрбір айып ең көп дегенде 10 жылға бас бостандығынан айырады, — деп жазады AFP.

Журналистердің Болтонға тағылған айыптарға реакциясы туралы сұрағына жауап берген президент Дональд Трамп өзінің бұрынғы көмекшісін «нашар адам» деп атады.

Болтон Трамптың 2020 жылғы сайлау алдында өзінің «Бәрі болған бөлме» атты мемуарының жариялануына тосқауыл қою әрекеті сәтсіз болғанын еске салды.

— 2021 жылы менің электрондық поштамды бұзған кезде ФБР бұл туралы толық хабардар етті. Алдыңғы әкімшіліктің 4 жылында осы тергеулерден кейін бірде-бір айып тағылған жоқ. Содан кейін «Трамп 2 келді», ол Иосиф Сталиннің тұсындағы құпия полиция бастығының сөзін бейнелейді: «Маған адамды көрсетіңіз, мен сізге қылмысты көрсетемін», — деп қосты Трамптың бұрынғы кеңесшісі.

Айта кетейік, тамыз айында Трамптың ұлттық қауіпсіздік жөніндегі бұрынғы кеңесшісі Джон Болтонның үйінде тінту жүргізілді.