Трамптың жарлығын орындаудан бас тартқан АҚШ Әділет министрі жұмыстан босатылды
АСТАНА. ҚазАқпарат - АҚШ президенті Дональд Трамп өзінің көші-қон жайлы жарлығын орындаудан бас тартқан бас прокурор міндетін атқарушы - Әділет министрлігінің басшысы Салли Йейтсті қызметінен босатты, деп хабарлады Ақ үй.
Министрлікті басқаруға Виргиния штатының Шығыс округінің аймақтық прокуроры Дана Боенте тағайындалды, деп жазады ресейлік «РИА Новости» агенттігі.
«Прокурор міндетін атқарушы Салли Йейтс Құрама Штаттарды қорғауға бағытталған заңды жарлықты орындаудан бас тартып, әділет министрлігін сатып кетті», - делінген Ақ Үй мәлімдемесінде.
Ақ Үй Йейтстің Барак Обама әкімшілігінде жұмыс істегенін еске салды.
АҚШ бас прокуроры міндетін атқарушы, бұрынғы президент Барак Обама тағайындаған Салли Йейтс әділет министрлігінің заңгерлеріне Трамптың көші-қон туралы атқару жарлығын сотта қорғамау туралы тапсырма берген.
