Трансферттік баға белгілеуді өзгерту бюджетке қосымша түсім алуға мүмкіндік береді – Әділ Жұбанов
Мәжіліс депутаты Әділ Жұбанов трансферттік баға белгілеу мәселесі бойынша заңнамаға ұсынылып отырған өзгерістерді түсіндірді, деп хабарлайды Kazinform.
«Заң жобасында ұсынылып отырған норма бюджетке қосымша, мұның үстіне қомақты соманың түсуіне алып келеді. Заңнаманың қолданыстағы нормалары тиімсіз әрі халықаралық стандарттарға сай келмейді. Соңғы 5 жылда тексерулер мен мониторингтің қорытындысында бюджетке 160 млрд теңге өндіріп алынды. Осы заң жобасына бақылау тұрғысында нақты күшейтудің енгізілгенін ескерер болсақ, меніңше түсім еселеп артатын болады», - деді Әбід Жұбанов агенттік тілшісінің сауалына орай.
Оның атап өтуінше, нақты тетіктердің бірі нарықтық диапазон енгізу, сондай-ақ тараптардың өзара байланыстылығын кеңейту болмақ. Бұл да мәміленің нарықтық бағадан ауытқығаны анықталған жағдайда кірісті ұлғайтуға қарай түзетуге мүмкіндік береді.
«Қазіргі уақытта трансферттік бақылауға барлық халықаралық мәміле – экспорт, импорт жатады. Дегенмен осы заң қабылданғаннан кейін жергілікті есеп-қисапты ұсынуды өзгерту құралы бойынша салық төлеушілерді мониторингілеуді кеңейту жоспарланып отыр. Егер бұрындары жергілікті есеп-қисапты жиынтық жылдық кірісі 5 млн АЕК-тен, яғни 17 млрд теңгеден жоғары 231 ірі салық төлеуші ұсынса, ендігі уақытта осы заң жобасы аясында жергілікті есеп-қисап тапсыратын спалық төлеушілердің саны кемінде 3 есеге ұлғаятындығы күтіледі», - деді Мәжіліс депутаты.
Айта кетейік, бүгін Мәжілістің жалпы отырысында «Қазақстан Республикасының кейбір заңнамалық актілеріне трансферттік баға белгілеу мәселелері бойынша өзгерістер мен толықтырулар енгізу туралы» заң жобасы бірінші оқылымда мақұлданды.
