Түлкібаста «Тәуелсіздік жылдары» атты жиын өтті

Қазақстан Республикасы Тәуелсіздігінің 25 жылдығына орай «Ұлы Дала Елі Тәуелсіздіктің 25 негізі» іс-шаралар аясында Оңтүстік Қазақстан облысы Түлкібас аудандық мәдениет және тілдерді дамыту жөніндегі бөлімінің ұйымдастыруымен Азаттық ауылдық мәдениет үйінде «Тәуелсіздік жылдары» тақырыбында дөңгелек үстел өткізілді, деп хабарлайды аудан әкімдігінің баспасөз қызметі.

Іс-шараның мақсаты - жастар арасында тәуелсіздік ұғымының қасиетті екенін, Тәуелсіздік жылдарында жеткен жетістіктерімізді, дәулеті мен сәулеті жарасып өсіп келе жатқан тәуелсіз мемлекетіміздің басты тілегі халық қамы үшін, жастар үшін жасалып жатқаны туралы түсіндіру. Дөңгелек үстелде Түлкібас ауданының құрметті азаматы, зейнеткер М.Миркадиров сөз сөйлеп, өскелең ұрпаққа ел тарихын тереңінен түсіндіріп, Тәуелсіздік жылдарында жеткен жетістіктеріміз туралы, болашақтың кілті жастардың қолында екенін айтып өтті.

Іс-шара барысында тілдерді оқыту және дамыту орталығы директорының міндетін атқарушы Б.Сармышев, «Тәуелсіз елдің жастары», Тәуелсіздік алған жылы өмірге келіп, Тәуелсіз мемлекетімізбен қатар өсіп келе жатқан бейбіт елдің баласы Фархад Дуанабеков «Тәуелсіздік жылдары» тақырыбында баяндама жасап, баяндама соңында «Тәуелсіздікке тарту» атты жыр өлеңін оқыды. Дөңгелек үстелге Науаи атындағы жалпы орта мектебінің мұғалімдері, 10 сынып оқушылары, аудандық мәдениет және тілдерді дамыту жөніндегі бөлімінің қызметкерлері қатысты.