«Тұлпар» футзалдан УЕФА Кубогында алғашқы жеңісіне қол жеткізді
АСТАНА. 21 қараша. ҚазАқпарат - Қарағандылық «Тұлпар» Боснияның «Танго» клубын тізе бүктіріп, өз тарихында футзалдан УЕФА Кубогының Элиталық кезеңіндегі алғашқы жеңісіне қол жеткізді, деп хабарлайды vesti.kz
Алматыдағы Балуан Шолақ атындағы спорт сарайында өткен кездесу 8:3 есебімен аяқталды. «Тұлпар» сапында Шыңғыс Чингиз Есенаманов пен Алвес Дуглас Грасиано хет-трик авторлары атанса, Александр Довгань және Фейтоса Талес бір-бірден гол соқты, қонақтардан Семир Гушо және Огнен Эрич екі мәрте қақпадан саңылау тапты.
Бүгін осы уақытта алматылық «Қайрат» беларусьтің «ВитЭн» командасын қабылдап жатыр. Ойынның басталуы Астана уақытымен 20:30-да. Кездесуді «Ел Арна» тікелей эфирден көрсетеді.
Өздерінің келесі матчын қарағандылықтар 22 қараша күні «ВитЭнмен» өткізеді.
