Тұмауға қарсы екпені 400 мың алматылық алады

АЛМАТЫ. ҚазАқпарат – Күзгі – қысқы кезеңде тұмауға қарсы екпені 400 мың алматылық алады. Бұл туралы Алматы қалалық Қоғамдық денсаулық сақтау басқармасының басшысы Камалжан Надыров онлайн брифинг барысында мәлім етті, деп хабарлайды ҚазАқпарат тілшісі.

Оның айтуынша, негізгі қауіп тобына созылмалы аурулары бар адамдар, 65 жастан асқан егде жандар және медицина қызметкерлері кіреді.

«Қыркүйек айының басында тұмауға қарсы вакцинация басталады. Күзгі-қысқы кезеңде тұмауға қарсы екпені 400 мың алматылық алады. Сондай-ақ, 130 мың доза жеткізіледі деп күтудеміз. «СК-Фармация» ЖШС бірыңғай дистрибьюторына тұмауға қарсы вакцинаның 300 мың дозасына қосымша өтінім берілді»,- деді Камалжан Надыров.

Сонымен қатар ол тұмауға қарсы тегін вакцинаны кімдер алатынын айтты.

«Медициналық бақылаудағы балаларға, жетім және ата-анасының қамқорлығынсыз қалған балаларға, жүкті әйелдерге, созылмалы жүрек-тамыр жүйесі аурулары бар және эпидемиологиялық көрсеткіштер бойынша тыныс алу органдары дертіне ұшырағандар, медицина қызметкерлеріне вакцина тегін салынады»,– деді ол.