Түмен облысында автобус аударылды: 30 адам зардап шекті
АСТАНА. Қыркүйектің 11-і. ҚазАқпарат - Ресейдің Түмен облысында «Түмен - Ханты-Мансийск» тас жолының 334-ші шақырымында бүгін түнде «Mеrcedes» жолаушылар автобусы аударылды. Оқиға салдарынан 30 жолаушы зардап шекті,
деп хабарлайды РБК агенттігі.
Ресейдің Төтенше жағдайлар министрлігінің Орал аймақтық орталығының баспасөз қызметінің мәліметі бойынша, 7 зардап шегуші ауруханаға жеткізілді, олардың ішінде 1,5 жасар бала бар. Ведомстводан сондай-ақ, жол-көлік оқиғасының салдарын жоюға 28 адам және 9 техника жұмылдырылғаны хабарланды.
Соңғы кезде Ресей аумағында рейстік автобустардың қатысуымен бірнеше үлкен жол апаты орын алды. Атап айтқанда, шілденің 24-інде «Краснодар-Волгодонск» бағытында кетіп бара жатқан автобус, «Mеrcedes» маркалы автокөлік жанар-жағармай құйылған цистерна тіркемесімен соқтығысып қалды. Оқиға салдарынан 21 адам қаза болып, 9 адам жараланды.
