Түнде Алматы аспанынан аққан метеорит пе – министрлік жауап берді
АЛМАТЫ. KAZINFORM – Бүгін түнде Алматының және Алматы облысының тұрғындары аспанда ерекше құбылысты байқады. Әлеуметтік желіде аспанда ұшқан объектілердің көптеген бейнежазбасы тарады.
Алматылықтар көктен түскен аспан денелері метеорит болуы мүмкін екенін топшылады. Алайда ҚР Цифрлық даму, инновациялар және аэроғарыш өнеркәсібі министрлігінің баспасөз қызметі, бұл – жер атмосферасына кірген Starlink-31469 спутнигі болуы мүмкін екенін хабарлайды.
- В.Г. Фесенков атындағы Астрофизикалық институт мамандарының пікірінше, 13 маусымға қараған түні Алматы облысының тұрғындары байқаған ерекше құбылыс — Жер атмосферасына кіргенде бөлшектелген спутник қалдықтарының жануы. Бөлшектелген спутник 13.06.2024 күні Жер атмосферасына кіреді деп болжанған Starlink-31469 спутнигі болуы мүмкін, – деп хабарлайды министрліктен.
Айта кетейік, бұған дейін Алматыда таң ата күн ерекше қатты күркіреп, найзағай ойнағанын жазған едік.
