Турбизнес өкілдері кәсіби біліктілігін жетілдіреді
Аталған министрліктің баспасөз қызметі таратқан мәліметке сәйкес, еліміздің экскурсия жүргізуші-гидтерінің кәсіби біліктілігін жоғарылату мақсатында әдеп және өзін-өзі ұстау мәдениеті, топтық психология, дағдарыс жағдайында қабылданатын шұғыл шешімдер және басқа да турбизнес өкілдері үшін маңызды тақырыптарға арналған тегін оқыту курстары Алматы мен Нұр-Сұлтан қалаларында өтеді. Біліктілікті көтеруге арналған тренингтерді қазақстандық және шетелдік мамандар, оның ішінде Дүниежүзілік туристік гидтер қауымдастықтары федерациясының (WFTGA) мамандары жүргізеді.
«Экскурсия жүргізуші-гидтерге арналған тренингтердің алғашқы легі қарашаның 17-23 күндері Алматы қаласында өткізіледі. Қазақстандық туроператорларға арналған дәрістер Елордада 25-27 қараша аралығында ұйымдастырылады. Сондай-ақ, туроператорлар мен қонақүй бизнесінің өкілдері де осы күндері өткізілетін тренингтерге тегін қатыса алады», - деп атап өтті министрліктен.
Ведомство ақпаратына сәйкес, тренингтен өткен әр қатысушыға шара соңында арнайы сертификат табысталады. Бір апталық оқыту курсынан өткен экскурсия жүргізуші-гидтер Дүниежүзілік туристік гидтер қауымдастықтары федерациясы (WFTGA) атынан арнайы сертификатқа ие болады.