Тұрғын үй-комммуналдық шаруашылық бойынша бірыңғай ақпараттық жүйе құрылады
«Жаңа заң жобасы аясында үй-жай меншік иелері тарапынан бақылауды қамтамасыз ету және меншік иелері, басқарушы компаниялар, сервистік ұйымдар және әкімдіктер арасындағы өзара іс-қимылды жақсарту үшін тұрғын үй-коммуналдық шаруашылығының ақпараттық жүйесін құру көзделіп отыр. Жүйе көппәтерлі тұрғын үйді басқару органдары қызметінің айқындылығын қамтамасыз етеді, тұрғындар шығындар мен табыстардың есебін көре алады, үйді басқару мен күтіп ұстау бойынша электрондық дауыс беру арқылы шешім қабылдай алады»,-деді министрлік өкілі.
Оның айтуынша, тұрғындардың үйге қызмет көрсету бойынша электрондық өтінім (арыз, хабарлама және т.б.) беруге және оның орындалуын қадағалауға мүмкіндігі болады.
«Жүйенің маңызды міндетінің бірі - жиналған жарналарды дұрыс жұмсау және көппәтерлі тұрғын үйді күрделі жөндеуден өткізу үшін жинақтардың ашықтығын қамтамасыз ету. Шоттағы ақшаның қозғалысы заң талаптарына сәйкес банктік және заңмен қорғалатын жүйеде көрініс табады. Кондоминиумнің басқару органдарын тұрғын үй қоры және тұрғын үй-коммуналдық шаруашылығының бірыңғай ақпараттық жүйесінде үйді күтіп ұстау бойынша шарт жасасуын заңнамалық түрде міндеттеуді ұсынудамыз» - деді ол.
Ол бойынша тұрғын үй қоры және тұрғын үй-коммуналдық шаруашылығының бірыңғай ақпараттық жүйесінде міндетті түрде үйдің техникалық паспорты, меншік иелері туралы деректер мен есептеуіштердің көрсеткіштері енгізілуі қажет.
«Ағымдағы қажеттіліктерге жинақ шотынан қаражат жұмсау керек болғанда бірыңғай ақпараттық жүйе тұрғындарға ескертеді және растауын талап етеді. Сонда өз үйін басқаруға мүлде қатыспайтын меншік иелері азая түседі. Тұрғын үй қоры және тұрғын үй-коммуналдық шаруашылығының бірыңғай ақпараттық жүйесі тұрғындарға үйін 24/7 онлайн тәртібінде басқаруға мүмкіндік береді», - деді М. Әбдікәрімов.
Еске сала кетейік, бұған дейін тұрғын үй-коммуналдық шаруашылығы саласы өзгеріске ұшырайтынын жазған болатынбыз.