Тұрғын үй құрылысына бөлiнетiн қаражат қысқартылады - сенатор
АСТАНА. ҚазАқпарат - Бюджеттiк бағдарламаларды оңтайландыру барысында тұрғын үй құрылысына бөлiнетiн қаражат 5-10 млрд теңгеге дейiн қысқартылуы ықтимал. Бұл туралы бүгiн ҚР Парламентi Сенатының депутаты Ахан Бижанов мәлiм еттi.
"Тұрғын үй мәселесi жөнiнде бiзде бюджетте өзгертулер болады. Оны ашық айту керек. Бiз бұның алдындағы бюджетте жоспарлаған 30 млрд теңгенi 20-25 млрд теңгеге дейiн қысқартамыз ба деген ойымыз бар. Бұл әлi қаралады", - дедi сенатор.
Оның сөзiне қарағанда, мемлекеттiк тұрғын үй құрылысы бағдарламасына қаражат аз бөлiнгенiмен, жалпы құрылыс саласында өсiм болады деп жоспарланған.
"Жалпы құрылыс саласында бiз жылда 6 млн шаршы метр үй салатынбыз. Бюджеттен қаралатын қаражатты халықаралық дағдарысқа байланысты бiз азайтамыз. Ал жалпы қарағанда, республика бойынша құрылыс саласында 2-3 пайыз өсiм болады деп жоспарлануда", - деп атап өттi Ахан Бижанов.
