Туристердің қалауы түскен ТОП-10 қала
АСТАНА. ҚазАқпарат - Euromonitor International зерттеу агенттігі шетелдік туристердің таңдауы жиі түсетін әлемдегі жүз атақты қалаларды атады.
Атап өтерлігі, биыл бірінші ондыққа Азияның бірден алты қаласы енді. 32 азиялық қала жүздікке кірді. Бұл шетелдіктер үшін осы өңірдің ерекше тартымдылығын көрсетеді.
Бірінші орында - Гонконг. Қалаға келген саяхатшылардың жалпы саны 24 млн. адам. Екінші орында - Сингапур. Бұл жаққа 21 млн. саяхатшы ат басын тіреген. Бұл додада Бангкок (15, 8 млн. адам) пен Лондон (15,5 млн. адам) тең түсіп тұр. Мәскеу рейтингте 24-ші орынды иеленді.
Халықаралық ұшулар санының көрсеткіші бойынша елдердің бестігіне Германия, АҚШ, Ұлыбритания, Қытай және Ресей кірді. Осыған байланысты көптеген елдер туристерді тарту мақсатында визалық оңайлатылған режімге көшіпті. Мысалы 2014 жылдың 1 қаңтарынан бастап Оңтүстік Корея ресейліктерге ұзақтығы 60 күннен аспаса, визасыз-ақ келе берулеріне мүмкіндік берді.
Туристердің қалауы түскен топ-10 қала
1. Гонконг 2. Сингапур 3. Бангкок 4. Лондон 5. Макао 6. Куала-Лумпур 7. Шэньчжень 8. Нью-Йорк 9. Анталья 10. Париж
