Түркі академиясы 2018 жылды «Мағжан жылы» деп жариялады
АСТАНА. ҚазАқпарат - Түркі академиясы 2018 жылды «Мағжан жылы» деп жариялады. Бұл туралы бүгін Түркі академиясы халықаралық ұйымының (TWESCO) басшысы Дархан Қыдырәлі Орталық коммуникациялар қызметінде өткен брифингте мәлім етті, деп хабарлайды Қазақпарат.
Қазақтың көрнекті ақыны, Түркі әлемінің тұлғасы Мағжан Жұмабаевтың туғанына биыл 125 жыл толады. Академия осыған орай Түркістан идеясын ту еткен ақынның шығармаларын шет тілдерге аударып, басып шығаруды қолға алды.
Атап айтқанда, Академияның ғылыми жобасы аясында классик ақынның шығармаларын өзбек тіліне белгілі ақын Музафар Ахмад, моңғол тіліне ақын-аудармашы Жүкел Қамай, алтай тіліне шығыстанушы ғалым, ақын Бронтай Бедюров, әзербайжан тіліне Фузули Маджидли аудара бастады. Бұдан бөлек, Мағжанның жырларын қырғыз, мажар тілдеріне аудару жоспарланған.
Айта кетерлігі, былтыр TWESCO Махамбеттің шығармаларын моңғол тіліне аударып, басып шыққан болатын. Сонымен қатар, брифингте Түркі академиясы Түркі ынтымақтастығы ұйымдарымен бірлесіп жыл бойына ақынның өмірі мен әдеби мұрасына арналған іс-шаралар өткізуді жоспарлап отырғаны жөнінде айтылды. 
