Түркістан облысы аумағында криминогендік ахуал толық бақылауда
ТҮРКІСТАН. ҚазАқпарат-Түркістан облысы аумағында криминогендік ахуал толығымен бақылауда. Бұл туралы барлық құқық қорғау органдары басшыларының қатысуымен шұғыл штаб өткізген облыс әкімі Өмірзақ Шөкеев мәлімдеді,деп хабарлайды ҚазАқпарат тілшісі.
Облыс басшысы Түркістан облысы тұрғындарының қауіпсіздігін қамтамасыз ету мақсатындағы жұмыстар күшейтілетінін айтты. «5 қаңтар күні Мемлекет басшысының Жарлығымен және ҚР Конституциясының 44-бабына, «Төтенше жағдай туралы» ҚР Заңына сәйкес, Түркістан облысы аумағында 5 қаңтар сағат 22.00-ден бастап 19 қаңтар сағат 00.00-ге дейінгі аралықта төтенше жағдай енгізілді. Аталған құжаттың негізінде Түркістан облысының комендатурасы құрылып, оған «Төтенше жағдай туралы» ҚР Заңымен көзделген өкілеттіктер беріледі. Түркістан облысында жалпы жағдай тұрақты деп айтуға болады»,– деді Өмірзақ Шөкеев. Төтенше жағдай кезінде бекітілген уақытша шектеулер жайлы баяндаған Түркістан облысының Бас комменданты – Түркістан облыстық Полиция департаментінің бастығы, генерал-майор Қайрат Дәлбеков заң бұзушылықтарға жол берудің зардабы ауыр екенін ескертті.
