Түркістан облысына ҚР Премьер-Министрінің бірінші орынбасары келді
ТҮРКІСТАН. ҚазАқпарат - Бүгін Түркістан қаласына ҚР Премьер-Министрінің бірінші орынбасары Асқар Мамин бастаған жұмысшы топ келді. Аймақ басшысы Жансейіт Түймебаев делегацияға облыс орталығындағы бірқатар нысандарды таныстырды, деп хабарлайды ҚазАқпарат тілшісі.
Делегация алдымен Түркістандағы Отырар шағын ауданында болып, әкімшілік-іскерлік орталықта бой көтеріп жатқан нысандарды аралап көрді. Онда қазіргі таңда 26 көпқабатты тұрғын үйдің құрылыс жұмыстары жүргізілуде. 1 536 пәтердің 1200-і (20 тұрғын үй) арендалық үйлер болса, қалған 6 тұрғын үй, яғни 336 пәтер кредиттік баспаналар қатарында. Биыл қыркүйек айында іргетасы қаланып, бюджет есебінен салынып жатқан 20 тұрғын үйдің 11-і келер жылдың сәуір айында тапсырылады деп жоспарланған. Ал, 9 тұрғын үй келер жылдың қараша айына пайдалануға беріледі. Кредиттік көпқабатты 6 тұрғын үйдің құрылыс жұмыстары маусым айында аяқталады.
ҚР Премьер-Министрінің бірінші орынбасары бастаған жұмысшы топқа Түркістан қаласының әкімі Әліпбек Өсербаев облыс орталығын инфрақұрылыммен қамту жоспарымен таныстырды. Түркістан қаласының инженерлік инфрақұрылымы қазіргі таңда салынып жатқан әкімшілік-іскерлік орталығының 270 гектар және рухани-мәдени орталығының 98 гектар аумағын қамтамасыз етуге мүмкіндік береді. Ағымдағы жылы Түркістан қаласында 20 мың абонент газбен қамтамасыз етіліп, қамту деңгейі 58 пайызға жететін болады. 
