Түркістан облысында 13 мыңға тарта адамға коронавирус вакцинасы салынды

ТҮРКІСТАН. ҚазАқпарат - Түркістан облысы вакцинация бойынша көш бастап тұр. Өңірде өз еркімен 13 мыңға жуық адам коронавирусқа қарсы екпе қабылдады, деп хабарлайды ҚазАқпарат.

Оның ішінде 10 674 медицина қызметкері мен 1276 педагог бар. Ал, 444 - полиция қызметкері мен 75 - басқа да санаттағы азаматтар.

Қазір екінші компонентпен 3264 адам вакцина салдырды. COVID-19-ға қарсы вакцинация 20 емдеу мекемесінде жүргізілуде.

Қазіргі уақытта облыста эпидемиологиялық жағдай тұрақты.

Соңғы тәулікте Түркістан облысында 10 адамда COVID-19 індеті расталған.

Жалпы облыста пандемия белең алғалы 574 400 ПТР сынама алынған.

Ал соңғы тәулікте зертханаларда 2758 адам тексерілді. Жұқпалы аурулар ауруханасында барлығы 610 орын бар, оның 478-і - бос.

Аймақта бүгінде жалпы 23429 медицина қызметкері бар. Оның 5 мыңнан астамы - дәрігерлер, қалғаны - орта буын мамандары.

Ақ халатты жандардың ерен еңбегінің арқасында өңірде қауіпті індетті жұқтырған 4292 науқас толық жазылып шыққан.

Жалпы, пандемия басталғалы Covid-19 инфекциясы расталған 4445 жағдай тіркелді. Оның 2849-да ауру симптомсыз өткен болатын.

Облыстағы мекемелерде 8 оттегі станциясы, 400 ӨЖЖ аппараты, мыңнан аса оттегі аппараты бар.

2 айға жететін дәрі-дәрмек қоры жасақталған, 40-тан астам дәрі қоймасы, 800-дей дәріхана жұмыс істейді.