Түркістан облысында 2 мыңға жуық оқушы апатты мектепте білім алып жүр
ТҮРКІСТАН. ҚазАқпарат - Қазіргі кезде Түркістан облысында 4 апатты мектеп бар. Онда екі мыңға жуық оқушы білім алып жатыр, деп хабарлайды ҚазАқпарат тілшісі.
Жалпы Түркістан облысында 2025 жылға дейін 199 мектеп салу жоспарланған. Бүгінде аталған білім ордаларының құрылысы кезең-кезеңімен жүргізіліп жатыр.
Мәселен, биыл өңірде 59 мектептің құрылыс жұмысына 20,7 млрд теңге қаржы қаралды.
Жоспарға сәйкес оның 34-нің құрылысы жыл соңына дейін аяқталуы тиіс.
Биыл бюджет қаржысы есебінен 21 мектеп, жекеменшік 13 мектептің құрылысы аяқталып, ел игілігіне табысталуы тиіс.
«Жаңа оқу жылының қарсаңында 5 мектеп пайдалануға берілді. Ал, жыл соңына дейін 16 білім ордасының құрылысы аяқталады деп жоспарлануда. Оның ішінде, 4 апатты және 2 үш ауысымды мектептің құрылысы жүріп жатыр»,-делінген Түркістан облысы адами әлеуетті дамыту басқармасының баспасөз қызметі таратқан ақпаратта.
