Түркістан облысында 3,5 мыңға жуық жүргізуші жол ережесін бұзған
ШЫМКЕНТ. ҚазАқпарат - Түркістан облысында 3,5 мыңға жуық жүргізуші жол ережесін бұзған. 11-14 қазан аралығында «Қауіпсіз жол» жедел-профилактикалық шарасын өткізген полицейлер 500-ге тарта тұрғынның көлікті ұялы телефонмен сөйлесіп отырып жүргізетінін анықтады, деп хабарлайды ҚазАқпарат тілшісі.
Рейдтік шараға Түркістан облыстық ІІД Жергілікті полиция қызметі, жол-патруль полициясы, учаскелік инспекторлар мен басқа құрылымдардан барлығы 600-ге жуық қызметкер жұмылдырылды. Жедел-профилактикалық іс-шара нәтижесінде көлік құралын масаң күйде басқарған 39 адамды ұстады. Жылдамдықты арттырған 179 жүргізуші мен маневр жасау тәртібін бұзған 123 жәйт бойынша хаттама толтырылған.
Сондай-ақ, 441 жүргізушінің ұялы телефон пайдаланғаны, 658 жүргізушінің қауіпсіздік белдігін қолданбағаны тіркеуге алынды. Жаяу жүргіншілерге жол бермеген 33 жайт бойынша қала тұрғындары жауапкершілікке тартылған.
