Түркістан облысында биылдыққа алтыншы үшем дүниеге келді
ТҮРКІСТАН. ҚазАқпарат - Түркістандық дәрігерлер шала туған үшемді аман алып қалды. Жыл басынан бері өңірде алтыншы үшем дүниеге келді, деп хабарлайды ҚазАқпарат.
Облыстық қоғамдық денсаулық сақтау басқармасының мәліметінше, нәрестелер Түркістан қаласында орналасқан № 3 облыстық перинаталдық орталығында дүниеге келді.
Үш ұл баланы 39 жастағы Дилхумар Юсупова ота арқылы босанған.
Дәрігерлер туғанда салмағы небәрі 1,7 келі (1700 грамм, бойы - 40 см, 1700 грамм, бойы - 39 см, 1970 грамм - бойы 42 см) болған үш ұлды 13 күн бойы күтіп, жетілдірген.
Мерзімінен ерте туылған үшем перзентхана дәрігерлерінің бақылауына алынған.
Медицина қызметкерлерінің көмегімен сәбилер салмақ қосып, жағдайы жақсарған.
Түркістандық дәрігерлердің біліктілігі мен күтімінің, тынымсыз еңбегінің арқасында шала туған шақалақтар аман қалып, анасы оларды бауырына баса алды.
Мамандардың сөзінше, қазір олардың өміріне төніп тұрған қауіп жоқ. Нәрестелерге жақындары Хасан, Хусан және Мухаммад деп ат қойған.
Айта кетсек, үшем дүниеге келген отбасының төрт қызы мен екі ұлы бар.
39 жастағы келіншек 9 баланың анасы атанды.
Көпбалалы ана үй шаруасында, ал отағасы қарапайым жұмысшы.
Былтыр № 3 ОПО-да орталығында 10 мыңға жуық сәби дүниге келді.
Жыл басынан бері мұнда 6 мың нәресте дүниеге келген. Орталық дәрігерлері жыл сайын жүздеген шала туған нәрестелердің өмірін сақтап қалуда.
