Түркістан облысында екі ауылдың атауы қазақшаланады

АСТАНА. ҚазАқпарат – Түркістан облысындағы Чичерино және ҚазССР 40 жылдығы ауылдарының атауы өзгеруі мүмкін, деп хабарлайды ҚазАқпарат тілшісі.

«Сарыағаш ауданы Қапланбек ауылдық округіндегі Чичерино ауылы Сіргелі ауылы болып аталсын. Мақтаарал ауданы Мақтаарал ауылдық округіне қарасты ҚазССР-нің 40 жылдығы ауылының атауы Әл-Фараби ауылы болып өзгертілсін. Шешімнің орындалуын бақылау Түркістан облысы әкімінің жетекшілік ететін орынбасарына жүктелсін», - делінген Ашық НҚА порталында жарияланған әкімдік қаулысы мен облыстық мәслихаттың бірлескен шешім-жобасында.

Құжат 25 шілдеге дейін көпшілік талқылауда болады.

Қоса кетсек, Түркістан облысына жұмыс сапарымен барған Парламент Мәжілісінің депутаты Ұласбек Сәдібековпен кездескен Құсшы ата ауылының тұрғындары екіге бөлініп кеткен ауылды біріктіру мәселесін көтерді.