Түркістан облысында екі күн ішінде төтенше жағдай тәртібін бұзған 253 жайт анықталды
ТҮРКІСТАН. ҚазАқпарат - Түркістан облысы полиция департаментінің жеке құрамы елдегі төтенше жағдай басталғалы қызмет атқарудың күшейтілген режиміне көшкен болатын. Тәртіп сақшылары тарапынан қоғамдық тәртіпті қамтамасыз ету және төтенше жағдай режимін бұзуға жол бермеу бойынша бақылау күшейтілген. Бұл жөнінде Түркістан облысы әкімінің баспасөз қызметіне сілтеме жасап ҚазАқпарат хабарлайды.
Соған қарамастан, небары екі күннің ішінде өңірде 33 әкімшілік құқық бұзу фактісі анықталды. 6 тәртіп бұзушы әкімшілік қамауға алынса, 15 адамға әкімшілік айыппұл салынып, тағы соншасына ескерту берілді. Қалғанына қатысты материалдар сотқа жолданды.
Тәртіп сақшылары төтенше жағдайға қарамастан жұмыс істеп тұрған моншаны, түнгі уақытта жұмыс істеп тұрған бильярд орнын анықтады. Тәртіпке бағынбағандар арасында карантинге қарамастан блокпосттан өтіп кетуге тырысқан автокөлік иелері ұсталып, іс сотқа жолданған.
Осы уақыт арасында 253 құқық бұзушылық анықталған. 100-ден астам адам қамауға алынды. Төтенше жағдай кезінде дүкендердің, қоғамдық тамақтану және басқа да мекемелердің жұмыс тәртібін бұзуы мен отбасылық мерекелерді ұйымдастыруы жайттардың жолы кесілді.
Түркістан облысының полицейлері халықтың құрылыс және егіс жұмыстарына жұмылдырылған автокөліктердің, азық-түлікпен, дәрі-дәрмекпен, медициналық бұйымдармен қамтамасыз етумен қатар медициналық көмекке мұқтаж адамдарды қоспағанда карантиндік режимді қатаң сақтауды ескертіп, аса қажеттілік туындамаса үйден шықпауға шақырады.
