Түркістан облысында қатты желден құлаған электр бағаналары қалпына келтіріліп жатыр
Наурыз айының 13-14 күндері ауа райының қолайсыздығынан аудан, қалалардағы 5 338 дана электр бағана құлап, 100-ге жуық елді мекен жарықсыз қалған.
Бұл туралы бүгін өңірлік коммуникациялар қызметінде өткен брифингте энергетика және тұрғын үй-коммуналдық шаруашылық басқармасы басшысының орынбасары Бақытжан Полатбеков мәлімдеді.
Оның сөзінше, бүлінген нысандарды қалпына келтіру жұмысына облыстық бюджеттен 260 млн теңге қаражат бөлінген.
«Оқиға салдарынан Арыс, Кентау қалалары мен Бәйдібек, Ордабасы, Отырар аудандарының электр желілеріне айтарлықтай зиян келді. Облыс әкімі Өмірзақ Шөкеевтің өкімімен зардаптың салдарын жою бойынша арнайы штаб құрылып, тиісті шаралар дер кезінде ұйымдастырылды. Нәтижесінде «KEGOC» АҚ-на қарасты 110 дана электр бағанасы толығымен орнатылып, іске қосылды. Сондай-ақ, 62 дана СК-26 маркалы электр бағаналары және 3 400 дана оқшаулағыш жеткізілді. Тасымалдау және қалпына келтіру жұмыстары жалғасуда», – деді Б. Әнуарбекұлы.
Қалпына келтіру жұмысына жалпы 170-тен астам техника, 473 адам жұмылдырылған.
Жауапты мамандар жөндеу жұмысы 10 сәуірге дейін толық аяқталатынын айтты.
Еске салсақ, ауа райының қолайсыздығына байланысты Түркістан облысының бес ауданындағы елдімекендер жарықсыз қалған болатын.
Одан кейін Түркістан облысында 60-қа тарта елдімекен екі аптаға жуық уақыттан бері жарықсыз отырғанын хабарлаған едік.