Түркістан облысында қоғамдық тамақтану орындарының қызмет көрсету уақыты өзгерді
ТҮРКІСТАН. ҚазАқпарат - Түркістан облысында бірқатар карантин талаптарына өзгерістер енгізілді. Өңірдің бас санитар - дәрігерінің қаулысына өзгерістер енгізіліп, қоғамдық тамақтану орындарының қызмет көрсету уақыты кешкі сағат 22:00-ге дейін ұзартылды, деп хабарлайды ҚазАқпарат тілшісі.
Жаңа қаулыға сәйкес, мейрамханалар мен дәмханаларда келушілерге әлеуметтік қашықтықты сақтай отырып қызмет көрсетуге рұқсат берілді. Сондай-ақ, ашық ауада және жабық бөлмеде залда келушілері 50-ден аспайтын орындарға (ұжымдық іс-шараларсыз) да рұқсат берілді. Ал, Халыққа қызмет көрсету орталықтарының (ХҚКО) жұмысы (оның ішінде арнайы ХҚКО), жұмыс күндері сағат 09:00-ден 18:00-ге дейін, ҚР Еңбек заңнамасына сәйкес демалыс және мереке күндері жұмыстары тоқтатылатын болды.
Сауда-ойын-сауық орталықтарындағы (жеке бөлмелерде) қоғамдық тамақтану нысандары жұмыс және демалыс күндері сағат 09.00-ден 21.00-ге дейін қызмет көрсететін болды. Барлық сыныптардың оқушыларын аралас оқытуға (сыныпта 25 оқушыдан асырмай, персонал маскалық режимде, термометрия, күшейтілген санитарлық-дезинфекциялық режим, іс-шараларды өткізбеу, алып келушілер мен ата-аналардың болуына жол бермеу) контингенті 300-ге дейінгі қалалық және ауылдық мектептерде сыныптардағы балалар санын 25-тен асырмай, дәстүрлі форматта оқытуға рұқсат етілді. Білім беру ұйымының әкімшілігінің шешімі бойынша, топтарда 15 адамнан асырмай сабақтан тыс мезгілде оқушыларды жеке оқытуға рұқсат етілді.
