Түркістанда ерекше қамқорлықтағы 35 қызға мерекелік сыйлықтар берілді
ТҮРКІСТАН. ҚазАқпарат - Түркістанда ерекше қамқорлықтағы 35 бүлдіршінге арнайы мерекелік сыйлықтар берілді, деп хабарлайды ҚазАқпарат тілшісі.
Түркістан қаласының әкімі Нұрбол Тұрашбеков оңалтудың жеке бағдарламасымен қамтылған 35 қыз баланы арнайы құттықтап, сый-сияпат жасады.
«Баланың бөтені болмайды» деген қала әкімі ерекше қамқорлықтағы бүлдіршіндердің аналарына алғысын айтты.
«Әлемдегі бейбітшілікті сақтайтын ең ұлы күш - аналардың тілегі және жүректегі мейірім. Біз мейірімді болуды Сіздерден үйренеміз. Өмірдің сын-сағаттарына сынбай, алға ұмтылыстарыңыз, ертеңге деген үміттеріңіз - қайрат пен жігердің үлгісі. Бүгінгі басқосуымызды пайдаланып, мен әр біріңізге шынайы ризашылығымды білдіргім келеді» - деді қала әкімі.
Мерекелік кеште бүлдіршіндердің көңілін ертегі кейіпкерлері көтеріп, түрлі ойындар ұйымдастырды. Тәттілер үлестіріліп, ойыншықтар таратылды.
Ал, Халықаралық әйелдер мерекесіне орай қалада ұйымдастырылған іс-шарада Қазақстанның еңбек сіңірген әртісі Нұрлан Өнербаев әннен шашу шашты. Мерекелік жиынға коммуналдық салада және әлеуметтік жүйеде жұмыс істеп жүрген келіншектер мен көпбалалы аналар қатысты.
