Түркістанда Ninety One тобының концерті өтпейтін болды - ұйымдастырушы
ТҮРКІСТАН. ҚазАқпарат - Көпшіліктің наразылығынан кейін Түркістан қаласында «Ninety One» және «Shiza» топтарының концерті өтпейтін болды, деп хабарлайды ҚазАқпарат тілшісі.
«Түркістан қаласының әкімдігі тұрғындар наразылығын ескере отырып, шараны ұйымдастырушы «Керуен сарай» туристік кешенінің басшылығына концертті өткізбеу жөнінде ұсыныс жолдады. Нәтижесінде, кешен әкімшілігі аталған әншілермен келісімді бұзғанын хабарлаймыз», - деп хабарлады «Керуен сарай» әкімшілігі.
Айта кетейік, 28 мамыр күні «Ninety One», ал 4 маусымда «Shiza» тобының концерті өтуі керек болатын. Алайда, жергілікті тұрғындар желі арқылы қос топтың концерт қоюына қарсылық білдірді. Көпшілік олардың рухани астанада өнер көрсетуі дұрыс емес деген мазмұнда пікір жазған.
