Түркістанда жастар қоғам қайраткерлерімен кездесті
Түркістан - жастардың алтын ордасы. Мұнда жаңа идеялар мен игі бастамалар аз емес. Тіпті оңтүстік жастарының басым көпшілігі осында білім алып, жұмыс істеп жатыр.
Аталмыш шараға Түркістан облыстық ардагерлер кеңесінің төрағасы, «Құрмет», «Парасат» ордендерінің иегері Жеңісбек Мәуленқұлов, «Құрмет», «Парасат» ордендерінің иегері, облыстық Қоғамдық кеңестің төрағасы Шәріпбек Жамалбекұлы, «Құрмет» орденінің иегері, Түркістан облыстық мәслихатының депутаты Өмірзақ Мелдеханов және Түркістан облыстық қоғамдық даму басқармасы басшысының орынбасары Сариев Дәурен Нұрланұлы қатысты.
Жиын барысында сөз бастаған Түркістан облыстық ардагерлер кеңесінің төрағасы Жеңісбек Мәуленқұлов ҚР Тәуелсіздігінің 30 жылдық мерекесімен құттықтай отырып, жастарды Тәуелсіздігіміздің қадірін біліп, еліміздің дамуына үлес қосуға шақырды. Ел тәуелсіздігінің тұғыры биік болуын сөз етіп,бүгінгі жетістіктің негізгі басты себебі —егемендік екеніне ерекше тоқталды. Бұл ретте оңтүстік жастарының белсенділігі мен 30 жылдыққа қосар үлес,салмақтары екшеліп,болашақта атқарылар жұмыс барысы талқыланды.
Қонақтар Жастар ресурстық орталығының және жас кәсіпкерлердің төл өнімдерімен танысып, орталық жанынан құрылған сурет үйірмесі көрмесін тамашалады. Ардагерлер болашақ жас кәсіпкерлерге ақыл-кеңестерін беріп, ел тәуелсіздігін қастерлеуге шақырып, алғыстарын арнады.
Кездесуде қоғам қайраткерлері жастарға өз өмірлері мен жүріп өткен жолдарынан естеліктер айта отырып,, ақыл-кеңесін айтып, ақ батасын берді.
Іс-шара барысында дәстүрлі әндер шырқалып, сұрақ-жауап алмасып, ұсыныстар айтылды.
