Түркістандағы газ жарылысына баллоның ақаулығы себеп болған - ТЖД
ТҮРКІСТАН. ҚазАқпарат – Түркістан қаласында тұрғын үйде болған газ жарылысына баллоның ақаулығы себеп болған. Бұл туралы Түркістан облысы Төтенше жағдайлар департаментінің баспасөз қызметі мәлімдеді, деп хабарлайды ҚазАқпарат тілшісі.
«21 наурыз күні сағат 19:40 шамасында Түркістан қаласы Қазыбек би көшесіндегі №231 жеке тұрғын үйде 25 литрлік газ баллоны редукторының ақаулығынан газды-ауа қоспасы жарылып, үй заттары мен жиһазы жанған және өрт үйдің шатырына өткен. Өрт сағат 20:39-да толық сөндірілді. Оқиға орнына Төтенше жағдайлар департаментінің жеке құрамынан 20 қызметкер мен 5 техника жұмылдырылды», - делінген Түркістан облысы Төтенше жағдайлар департаментінің баспасөз қызметі таратқан ақпаратта.
Еске салсақ, газ желісін өз бетінше қосып алған түркістандықтың үйінде жарылыс болған еді. Оқиға салдарынан бір отбасының 4 мүшесі күйік жарақатымен ауруханаға жеткізілген.
Үй иесі – 1993 жылғы азаматтың жағдайы ауыр, ал оның 2 жасар баласының денесін 34%, 4 жасар баласының денесін 35%, 5 жасар баласының денесін 38% күйік шалған. Барлығы да ауыр халде. Қазір ауруханада ем қабылдап жатыр.
