Түркістандағы көрмеде Елбасы туралы 350-ден астам дерек ұсынылды
ТҮРКІСТАН. ҚазАқпарат - Түркістанда Қазақстанның Тұңғыш Президенті-Елбасы Нұрсұлтан Назарбаевтың халық алдында атқарған қызметін, еліміздің жеткен жетістіктерін көпшілікке кеңінен насихаттау мақсатында «Елбасы және Қазақстан» атты көрме өтті, деп хабарлайды ҚазАқпарат.
Түркістан облысы әкімінің баспасөз қызметінен мәлім еткендей, онда Елбасыға арналған 150-ден астам кітап пен 200-ден астам естелік мағлұматтар жиынтығы қойылды.
Іс-шараны ашқан облыстық Мәдениет және тілдерді дамыту басқармасының басшысы Нұрдәулет Исабек көрменің мақсатын кең көлемде айтып өтсе, Елбасымен Теміртауда бірге оқыған курстасы Әсетулла Каримов пен жас ақын Мұқағали Кенжетайұлы елді дамудың даңғыл жолына бастаған Елбасының ұлы істеріне тоқталды. 
«Көрмеде Н.Назарбаевтың өмірі мен еңбек жолы, халық алдында атқарған қызметтері мен еліміздің жетістіктері кең көлемде қамтылған. Олардың ішінде Елбасыға арналған кітаптар, қызметі туралы құжаттар, фотоматериалдар және жеке қолданған заттары бар. Іс-шараға зиялы қауым өкілдері мен ардагерлер, студенттер, мәдениет, білім салаларының қызметкерлері мен БАҚ өкілдері қатысты. Өнерпаз жастар Елбасына арналған әндерді орындап, көпшіліктің қошеметіне бөленді», - делінген баспасөз баянында.
