Түркістандық шенеуніктер түрмедегі тәртіппен танысты

Аталған шара оңай олжаға құныққан азаматтардың тар қапастағы тыныс-тіршілігімен таныстыру арқылы мемлекеттік қызметкерлердің сыбайлас жемқорлыққа қарсы берік иммунитетін қалыптастыру мақсатында ұйымдастырылды. Оған Арыс, Кентау, Сайрам, Отырар, Түлкібас және Шардара аудандары әкімдерінің орынбасарлары, аппарат және дербес бөлім басшылары, ауыл әкімдері қатысты. 180-ге жуық лауазымды шенді Төлеби

ауданындағы ИЧ-167/9 мекемесінде болып, оның ішінде қамаудағыларды ұстау шарттары мен ішкі тәртіптің қатаңдығымен танысты. Қатаң тәртіптегі сотталушылардың жататын жері мен медициналық бөлмелерін және асхана, аулаларын аралап көрді. Жемқорлық көріністеріне жол бермеуді мақсат еткен ұйымдастырушылар лауазымды тұлғаларға көлеңкелі қылмыстың зардабын түсіндіріп, қызмет бабын асыра пайдаланып ақша табудың соңы осылай болатынын ескертті. Тұла бойды тітіркендіретін темір торды көрген шара куәгерлері мұздай қара құлып пен тікенді темір тордың арғы жағындағы өмірді өз көздерімен көріп, тар қапаста отырған азаматтардың қателіктерін қайталамайтынын жеткізді.

Айта кетсек, Түркістан өңіріндегі бұл жұмыстар жыл соңына дейін жүйелі түрде жүргізілетін болады. Келесі таныстыру жұмыстарына облыстық басқарма басшылары, аудан-қала әкімдері, бас дәрігерлер мен мемлекеттік мекеме басшылары қатысады деп жоспарланып отыр.