Түркия премьері 30 наурызда өтетін сайлауда жеңілген жағдайда саясаттан кетуге әзір
АСТАНА. ҚазАқпарат - Түркияның Премьер-министрі Тайип Эрдоган 30 наурызда жергілікті билік органдарына сайлауда партиясы жеңіліс табатын болса, саясаттан қол үзуге әзір екендігін айтты.
Бұл туралы үкімет басшысы Әділдік пен даму партиясын басқаратын штаб-пәтерде сөз сөйлеген кезде мәлім етті.
"Мен ашығын айтамын. Егер партиям сайлауда бірінші болмаса, саясаттан кетуге дайынмын. Басқалары да осындай әрекетке дайын ба? Халықтық-республикалық партия мен Ұлттық қозғалыс партиясының төрағалары орынтақтарын босата ма? Олар орындарын сақтап қалуға тырысады, қозғалатын ойлары да жоқ ", -деп атап өтті Эрдоган.
ӘДП беделі сыбайлас жемқорлыққа орай туындаған дау-дамай және премьер мен ұлының телефон арқылы сөйлескен сөздері жазбаларының әшкереленуіне байланысты едәуір төмендеді, деп хабарлайды ИТАР-ТАСС.
