Түркия туризм саласын қолдау шараларын ұзартты
АСТАНА. KAZINFORM — Түркия билігі шетелдік қонақтар санының артуына және сала кірістерінің молаюына байланысты туризм саласына берілген салық жеңілдіктері мен қаржылық қолдау шараларын ұзартуға шешім қабылдады, деп хабарлайды Kazinform агенттігінің Анкарадағы меншікті тілшісі.
Түркия президенті Режеп Тайип Ердоған үкімет отырысынан кейін туризм индустриясына енгізілген салық жеңілдіктері мен субсидиялардың ұзартылатынын мәлімдеді.
Атап айтқанда, елде жүріп-тұруға салынатын салықтың төмендетілген мөлшерлемесі тағы бір жылға ұзартылды. Сонымен қатар, Түркия Мәдениет және туризм министрлігі сертификаттаған туристік нысандардың жұмыс берушілерін қолдау шаралары 2028 жылға дейін сақталады.
Ердоғанның айтуынша, бұл шаралар саланы одан әрі қолдауға бағытталған.
Түркия президенті сондай-ақ туризм саласының көрсеткіштерін ұсынды. 2026 жылғы есепті кезеңде елге 49,1 миллион адам келді, ал туризмнен түскен кіріс 51,3 миллиард долларға жетті, бұл 2025 жылдың сәйкес кезеңімен салыстырғанда 2,4%-ға өскен. Туристердің орташа тұру ұзақтығы 10,34 түнді құрады, ал жан басына шаққандағы орташа шығын бір түнге 4,6%-ға өсіп, 107,70 долларға (шамамен 48 000 теңге) жетті. Шетелдік туристер арасында бұл көрсеткіш 120 долларға (шамамен 54 000 теңге) жақындады.
Ердоған оң үрдіс тек халықаралық жағдайға ғана емес, сонымен қатар туризм саласы өкілдерінің күш-жігеріне, үкіметтік инвестицияларға және ынталандыру шараларына да байланысты екенін тілге тиек етті. Қосымша факторлардың қатарында ол халықаралық әуе қатынасының кеңеюін, шетелдегі түрік телехикаяларының танымалдылығын және елдің жалпы халықаралық имиджінің нығаюын атап өтті.
Бұған дейін Түркия билігі туристік белсенділікті елдің барлық төрт маусымына және барлық өңіріне тарату жоспарлап отырғаны хабарланған.
Түркия жағалауынан әлемдегі ең көне кеме апатының іздері табылды.
