Түркияда 3 күндік қаралы күн жарияланды
АСТАНА. ҚазАқпарат - Түркия премьер-министрі Ахмет Давутоглу 86 адамның өмірін қиған Анкарадағы терактіден соң елде үш күндік қаралы күн жариялады, деп хабарлайды ТАСС.
"Бұл Түркияға, Түркияның демократиясына жасалған шабуыл. Қайғылы оқиғаға байланысты үш күндік қаралы күн жариялаймыз", - деді ол ел астанасында өткен баспасөз мәслихатында.
Елдің денсаулық сақтау министрлігінің соңғы мәліметтері бойынша лаңкестіктен 86 адам қаза тапқан , 200-ден астам адам жараланған. Түркиядағы террористік топтардың ешқайсысы теракт үшін жауапкершілікті өз мойнына алған жоқ.
Еске салайық, бүгін Анкарада «Еңбек. Бейбітшілік. Демократия» бейбіт наразылық шеруі кезінде 2 жарылыс орын алған болатын. Шеруге қатысушылар түрік билігі мен күрдтер арасындағы әскери қақтығыстарды тоқтатуды сұраған еді. ҚР СІМ Түркияның Анкара қаласында орын алған жарылыстан қаза тапқандар арасында қазақстандықтардың бар-жоғын анықтауда.
