Түркияда шаңғымен спорттық бағдарлау бойынша Еуропа чемпионаты өтеді
ТҮРКИЯ. ҚазАқпарат - 2019 жылдың 4-12 ақпанында Түркияның шығысында орналасқан «Джыбылтепе» тау шаңғы орталығында шаңғымен спорттық бағдарлау бойынша Еуропа чемпионаты өтеді, деп хабарлайды Анадолы агенттігі.
Спорттық іс-шараны ұйымдастыру бойынша Түркияның жастар және спорт министрлігі, Карс провинциясының губернаторы әкімшілігі және Сарыкамыш ауданының муниципалитеті қолдау көрсетеді.
Сарыкамыш муниципалитетінің басшысы Хексал Токсой агенттікке берген сұхбатында Түркияның шығысындағы спорттық инфрақұрылым мен туризмнің белсенді дамуына назар аударды.
Оның айтуынша, бұл Карс губернаторы әкімшілігінің үйлестіруімен жүзеге асырылып жатқан мемлекеттік инвестициялар мен жобалардың арқасында өткелі отыр.
Соңғы жылдары Сарыкамышта қысқы спорт түрлеріне ғана емес, жазғы спорт түрлеріне арналған нысандар да бой көтеріп жатыр, деп атап өтті Токсой.
Оның сөзіне қарағанда, Халықаралық спорт бағдарлау федерациясының (IOF) өкілдері Еуропадағы бірнеше шаңғы орталықтарына барғаннан кейін Сарыкамышты таңдаған.
