Түркияда «Тобыл» мен «Торпедо» футболшыларының күштері тең түсті
АЛМАТЫ. 20 қаңтар. ҚазАқпарат - Түркияда екінші оқу-жаттығу жиынын өткізіп жатқан Қостанайдың «Тобыл» футбол командасы Мәскеудің "Торпедосымен" спарингтік кездесу өткізді.
Қостанайлық команданың баспасөз қызметінің хабарлауынша, бұл ойында командалар қақпалардың ешбірінің «кілтін» аша алмай, 0:0 есебімен тарқасты. Сергей Масленов жаттықтыратын қостанайлықтар Қазақстан Премьер-лигасында өткен маусымда 6-шы орын алса, Борис Игнатьев баптайтын мәскеуліктер Ресей Ұлттық лигасында 2011/2012 маусымда 8-ші орын алған болатын.
Бұған дейінгі кездесуінде "Тобыл" Украинаның Полтова қаласының «Ворскла» командасымен кездесіп, 0:1 есебімен жеңіліс тапқан еді. Енді дүйсенбі күні бұл жиындағы ақырғы кездесуін Новокузнецк қаласының «Кузбас» аяқдопшыларымен өткізбек.
