Түркиялық Plan-S төрт IoT-спутнигін орбитаға шығарды
АСТАНА. KAZINFORM — Түркиялық Plan-S компаниясы төрт жаңа IoT-спутнигін орбитаға шығарып, ғаламдық интернет желісі (IoT) қамтуын кеңейтуге қадам жасады, деп хабарлайды Kazinform агенттігінің меншікті тілшісі.
Ғаламдық IoT қамту – IoT құрылғыларын орналасқан жеріне қарамастан, қашықтағы немесе қолжетімсіз аумақтарды қоса алғанда, бүкіл әлем бойынша қосуға және басқаруға мүмкіндік береді. Бұл жерүсті инфрақұрылымға тәуелді болмай, құрылғылар мен бұлттық платформалар арасындағы деректердің үздіксіз берілуін қамтамасыз ететін спутниктік байланыс арқылы жүзеге асады.
Түркияның Plan-S аэроғарыш компаниясы ғаламдық интернет заттар желісін құру жолында тағы бір маңызды қадам жасап, төрт жаңа спутникті сәтті ұшырды. Ұшырылым SpaceX компаниясының Falcon 9 зымыран тасығышы арқылы Transporter-14 миссиясы аясында жүзеге асты. Нәтижесінде Plan-S компаниясының белсенді спутниктерінің жалпы саны 17-ге жетті, оның ішінде 12-сі коммерциялық мақсатта қолданылады.
Аталған спутниктер IoT құрылғыларынан деректерді нақты уақыт режимінде жинауға арналған, бұл жер шарын толық қамтуды қамтамасыз етеді. Компания энергетика, ауыл шаруашылығы, логистика және инфрақұрылым сияқты салаларға қызмет ұсынып, кәсіпорындарға миллиондаған қосылған құрылғыларды тиімді басқаруға көмектеседі.
Plan-S тез дамып келе жатқан ғарыштық IoT секторының болашағына сенім артып отыр және 2030 жылға дейін жүздеген спутникті орбитаға шығаруды жоспарлап отыр. Бұл ауқымды жоспар компанияны халықаралық деңгейде ғарыштық IoT байланысы саласындағы негізгі ойыншылардың біріне айналдырады.
Plan-S спутниктер тобының дамуы экономиканың негізгі салаларын цифрландыруды жеделдетіп қана қоймай, жаһандық жеткізу тізбектері мен инфрақұрылымдық жүйелердің тұрақтылығы мен тиімділігін арттыруға ықпал етеді.
Бұған дейін біз Transporter-12 миссиясы аясында SpaceX компаниясының Falcon 9 зымыран тасығышы түркиялық Fergani Space компаниясының алғашқы FGN-100-d1 спутнигін орбитаға сәтті шығарғанын хабарлаған едік.
Сондай-ақ жақында алғашқы отандық Türksat 6A байланыс спутнигі іске қосылды.
