Түркістан облысында 14 бағытта жол жабылды

ТҮРКІСТАН. KAZINFORM - Қазіргі кезде Түркістан облысында 1 республикалық, 13 облыстық жол жабық тұр. Бұл туралы Түркістан облысы төтенше жағдайлар департаментінің баспасөз қызметі мәлімдеді.

Түркістан облысындағы қалың қар мен бұрқасын салдарынан жолдар жабылып жатыр. Төтенше жағдайлар департаментінің қызметкерлері мен құтқарушылары және полиция қызметкерлері күшейтілген тәртіппен жұмыс істеуде.

Қазіргі кезде республикалық «Алматы – Ташкент – Термез» тас жолының Түлкібас аумағындағы бөлігі барлық автокөлік түрлері үшін жабылды. Сондай-ақ, Созақ ауданындағы облыстық маңызы бар «Шолаққорған-Ащысай-Кентау» автожолында да күн райының нашарлауына байланысты барлық көлік түрінің қозғалысына тыйым салынды.

«Облыс аумағындағы «Қошқарата-Жарықбас-Бірлік», «Ұланбел-Созақ-Шолаққорған-Шаян-Екпінді» Түлкібас ауданындағы «Машат» демалыс аймағы, «Кершетас-Келтемашат-Даубаба», «Көксәйек-Нысанбек», «Шымкент-Қасқасу-Көксәйек-Сайрам», «Балықты-Абай-Пәстелі-Жаскешу», «Шарапхана-Жанабазар-1 мамыр», «Ағайдар-Екпінді» жолдарында барлық автокөліктердің қозғалысына шектеу қойылған. Қазіргі кезде құтқарушылар жолда қалып қойған көліктерге көмек беріп жатыр. Әзірге қар құрсауында қалып қойған жолаушылар жоқ» - делінген Түркістан облысы ТЖД баспасөз қызметі ұсынған ақпаратта.