Түркістан облысында 24 елді мекен таратылады
Түркістан облысында 24 елді мекен таратылады. Бұл туралы облыстық қоғамдық кеңес отырысында Жер қатынастары басқармасының басшысы Ерғали Тілеген мәлімдеді, деп хабарлайды Kazinform.
Басқарма басшысының айтуынша, тұрғылықты халқы 50 адамнан аз 20 елді мекендер таратылса, 4 елді мекен біріктірілетін болады. Олардың ішінде Бәйдібек ауданынан Нұра, Үсіктас, Байжансай елді мекендері бар. Ал, Созақ ауданынан Қақпансор, Қоңыратарық кірген. Сондай-ақ, Жетісай, Шардара, Сарыағаш, Қазығұрт, Сауран, Түлкібас ауданы мен Арыс қаласынан халық саны 50-ге жетпейтін елді мекендер тізімге еніп отыр.
«Бұл жерде елді мекендер ешқайда көшірілмейді. Тек қасындағы ауылдық округ аумағына қарайтын болады. Әлеуметтік төлемдер қысқармайды, бұрынғыша барлығы төлене береді»-деді Ерғали Тілеген.
