Түркістан облысында есірткі контрабандасына қатысты 100-ден астам шетелдік ұсталды
ТҮРКІСТАН. KAZINFORM – Қолға түскендер қатарында 88 Өзбекстан және 37 Тәжікстан Республикасының азаматы бар. Бұл туралы Түркістан облысы полиция департаментінің баспасөз қызметі мәлімдеді.
Тәртіп сақшылары биылғы жылдың 10 айында есірткінің заңсыз айналымына қатысты 652 дерекке тосқауыл қойды. Оның 267-сі қылмыс болса, 385-і теріс қылық. Сондай-ақ, 42 дерек есірткі сатуға қатысты болса, 13 дерек аса ірі көлемде есірткі сақтау, 67 дерек құрамында есірткі заты бар өсімдіктерді өсірумен байланысты. Ал, есірткіні, психотроптық заттарды заңсыз жарнамалау, насихаттау бойынша 8 дерек тіркелген.
Полиция мен прокуратура өңір жастарымен бірлесіп, 100-ге жуық есірткі жазбаларын жойды. Заңсыз айналымнан 335 келіге жуық есірткі заттары тәркіленді.
Трамадолға қатысты 2 қылмыстық іс, 1 теріс қылық тіркеліп, 1000 дана трамадол дәрісі тәркіленді. Сондай-ақ, есірткі қойып кетуші 34 тұрғын анықталып, олардан 4 келіден астам синтетикалық есірткі алынды. Сонымен қатар тікұшақпен аудандарда есірткі егуге ықтимал жерлерге әуемен барлау жұмыстары жүргізілді.
«Есірткіні контрабандалық жолмен тасымалдаудың 137 арнасының жұмысы тоқтатылды. Атап айтар болсақ, контрабанданың 127-сі Өзбекстан шекарасынан Қазақстан аумағына өту кезінде анықталды. Ал, 10 жайт Қазақстаннан Өзбекстанға өту сәтінде жолы кесілді. Күдіктілердің 88-і өзбекстандық болса, 37-сі Тәжікстан Республикасының азаматтары» - делінген Түркістан облысы полиция департаментінің баспасөз қызметі ұсынған ақпаратта.
Айта кетейік, бұдан бұрын ШҚО тұрғынының көлігінен 240 келіден астам тірі шаян табылғанын жазған болатынбыз.
