Түркістан облысында мыңнан аса автономды жылу қазандығы бар

ТҮРКІСТАН. KZINFORM - Түркістан облысындағы жылыту маусымы өңірдегі 12 ауданда биыл 11-21 қазан аралығында басталды. Қалған 5 аудан, қалада жылу маусымы 1 қарашадан басталмақ. Бұл туралы Түркістан облысы энергетика және тұрғын үй-коммуналдық шаруашылық басқармасы басшысының орынбасары Роза Сариева мәлімдеді.

Облыс көлемінде 1 жылу энергия орталығы, 34 орталықтандырылған және 1 622 автономды жылу қазандықтар бар. Жалпы облыстағы 737 көпқабатты тұрғын үй мен 2 243 бюджеттік мекеме жылыту маусымына толықтай дайын. Қазіргі таңда Кентау қаласындағы 6,6 шақырымдық магистральды жылу желілеріндегі жөндеу жұмыстары толық аяқталған.

«Өңірдің көмір отынына қажеттілігі - 684,1 мың тонна. Елді мекендерді газдандыру жұмыстарының нәтижесінде, қатты отынға тәуелділік өткен жылмен салыстырғанда 150 мың тоннаға азайған. Облысқа көмір тасымалдаумен 23 өңірлік оператор айналысады. Қазір көмір тұйықтарындағы көмір қоры 120 мың тоннаны құрап отыр. Жалпы жағдай қалыпты, көмір жоспарға сәйкес тасымалдануда. Аймақта көмірдің 1 тонна бағасы 19 850 – 22 000 теңге аралығында саудалануда. Сондай-ақ облысқа қажетті 7,8 мың тонна әлеуметтік мазутты ҚР Энергетика министрлігі тарапынан оператор мекемелері анықталып, бағасы бекітілді. Қыркүйек, қазан айларында өңірге 3 616 тонна мазут тасымалданды. Бұл бағыттағы жұмыстар жалғасып жатыр», - деді Роза Сариева.