Түркістан облысында «Өнегелі ұрпақ» апталығында ардагерлердің үй ауласында сенбілік өтіп жатыр
ТҮРКІСТАН. KAZINFORM – Республика бойынша өткізіліп жатқан «Таза Қазақстан» экологиялық акциясының төртінші «Өнегелі ұрпақ» апталығында Түркістан облысының барлық аудан-қаласында сенбіліктер өтіп жатыр.
Іс-шарада жастар мен ерікті азаматтар ардагерлер мен жалғызбасты қариялардың үй аулаларында тазалық әрі абаттандыру жұмыстарын атқарып жатыр. Атап айтқанда, шөп ору, жер аудару, ағаш бұталау, үйдің қасбеті мен қоршауларды сырлау, қоқыстан тазарту жұмыстары.
Мәселен, бүгін Қазығұрт ауданы Қақпақ ауылдық округінің ерікті жастары тыл ардагері Бисебай Ағабековтің үйіне арнайы барды. Онда белсенді жастар үй ауласындағы арық-атыздарды тазалап, ағаштардың түбін қопсытты. Сондай-ақ, аула аумағын күл-қоқыстан тазартты. Ардагер ақсақал жастарға ризашылығын білдіріп, ақ батасын берді.
Еске сала кетсек, еліміз бойынша экоакция аясында 27 сәуірден 4 мамырға дейін «Өнегелі ұрпақ», ал 4-11 мамыр аралығы «Мөлдір бұлақ» апталығы өтеді.
