Түркістанда нөмірленген 12 көше әлі атау алмаған

ТҮРКІСТАН. KAZINFORM – Қазіргі таңда облыс орталығында 800-ден астам көше бар. Қала әкімдігі нөмірленген көшелерге алдағы уақытта жаңа атау беру жоспарланып отырғанын хабарлады. 

Түркістан қаласының әкімдігі ұсынған ақпаратқа сәйкес, бүгінде шаһарда 845 көше тіркелген. Оның ішінде 316 көше тарихи тұлғалардың есімімен аталса, 451 көше жер-су атауларына берілген. Сонымен қатар 48 көше дәстүрлі атауларға жатса, 18 көше этнос өкілдерінің атымен аталған.

Ведомство мәліметінше, 2018 жылы Түркістанда 330 көшеге атау берілген.

– Оның барлығы дәстүрлі және жер-су атаулары тізімінен алынған. Ал 2023 жылы нөмірленген бірнеше көшеге Күйбасар, Дәстүр, Майлытоғай, Аднан Мендерес, ал бір даңғылға Есім хан есімі атауы берілген, - делінген әкімдік ақпаратында.

Дегенмен әкімшілік-іскерлік орталықта 2023 жылы пайдалануға берілген 12 көше әлі күнге дейін атаусыз, тек нөмірмен белгіленген. Алдағы уақытта бұл көшелерге жер-су атауларын беру жоспарланып отыр.

– Нөмірленген 12 көшеге Ордалы, Ақотау, Ақкент, Ақсу, Сұңқар, Ақсай, Көкжар, Құлагер, Ақсарай, Байқоныс, Ақбұлақ және Хантәңірі сияқты атаулар беру көзделген, - деп хабарлады ведомство.

Көше тақтайшаларын ауыстыру мәселесі әзірге кейінге қалдырылған. Қала әкімдігі 2025-2026 жылдары бұл мақсатқа қаржы қаралмағанын, 2027 жылға талдау жүргізіліп, қаржы бөлуге сұраныс берілетінін мәлімдеді.

Бұдан бұрын көше атауларына арнайы тізімге енген дәстүрлі атаулар, жер-су атаулары, тарихи тұлғалардың ғана атаулары берілетінін жазған едік.