Түркістаннан Теріскейге қоныс аударушылар көп
ТҮРКІСТАН. KAZINFORM – Түркістан облысынан жыл басынан бері 1 200-ге жуық азамат солтүстікке қоныс аударған. Бұл туралы қандастар мен қоныс аударушыларға арналған ақпараттық-түсіндіру орталығының жетекшісі Әнуар Бердібекұлы мәлімдеді.
Солтүстік Қазақстан облысына еліміздің еңбек күші артық өңірлерінен қоныс аударушыларды қабылдау бойынша іс-шаралар жүйелі іске асып келеді. Мәселен биыл жыл басынан теріскей өңірге Түркістан облысынан 300-ге жуық отбасы, 1 200-ге тарта азамат қоныс аударған.
«2024 жылы қандастар мен қоныс аударушылардың отбасыларын орналастыру үшін тиісті инфрақұрылымы, бос жумыс орындары мен сатылымға түскен үйлері бар 191 елді мекеннің тізімі бекітілді. 2023 жылы 2 460 азамат солтүстік аймақтарға көшіп келген», - деді спикер.
Сондай-ақ «TAUEKEL» ұйымының жетекшісі Бурахан Дақанов Теріскейге көшкісі келетін азаматтарға үкімет тарапынан қандай жеңілдіктер жасалатыны туралы айтты.
«Қоныс аударушылар үшін мемлекет отбасының әрбір мүшесіне 258 440 теңге мөлшерінде материалдык көмек көрсетеді. Сонымен қатар тұрғын үйді жалдау мен коммуналдық қызмет шығындарын өтеуге жәрдем беріледі. Одан бөлек, техникалық және кәсіптік білім алу үшін оқытуға жолданады. Сондай-ақ жаңа тұрғылықты жерінде кәсіпкерлікті дамытуға және жұмысқа орналасуға жәрдем көрсетіледі. 2023 жылдан бастап көшіп келген азаматтарға тұрғын үй сатып алу немесе салу үшін тұрғын үй құнының 50 пайызын беру көзделген», - деді ұйым жетекшісі.
