«Turkvizyon-2014» конкурсындағы жеңісімді Елбасымызға арнаймын - Ж. Дұғалова

АСТАНА. ҚазАқпарат - «Turkvizyon-2014» конкурсындағы жеңісімді Қазақстанның Тұңғыш Президенті, Елбасы Нұрсұлтан Назарбаевқа арнаймын. Бұл туралы бүгін Орталық коммуникациялар қызметінде өткен брифингте Татарстанның Қазан қаласында өткен халықаралық «Turkvizyon-2014» ән байқауында Қазақстан намысын қорғап, бас жүлдені ұтып алған Жанар Дұғалова айтты.

"Түркі әлемінде өткен дүбірлі додада бағымыз жанды. Қуанышпен, жеңіспен оралдық. Әнші ретінде, елімнің патриоты ретінде мен үшін бұдан асқан бақыт жоқ. Сайыста еліміздің беделі мен абыройын асқақтатуға барымды салдым. Ата-бабамның рухына арнап шығарған әнім жеңіс әкелді", - деп атап өтті ол.

Әншінің айтуынша, Қазақстанның мұндай ірі конкурстарға қатысуы - еліміздің бейбіт өмір сүруінің арқасы.

Бүгінде біз бейбіт елде өмір сүріп жатырмыз. Елімізді, Елбасымызды бүкіл әлем біледі. Осындай халықаралық сайыстарға барып өнер көрсетуіміздің өзі Елбасымыздың сындарлы саясатының арқасында деп ойлаймын. Және де бұл жеңіске Тұңғыш Президент күні қарсаңында қол жеткендіктен, мен бұл жеңісімді Тұңғыш Президентімізге, елбасымызға арнаймын!" - деді Ж. Дұғалова.

Айта кетейік, финалда үшінші болып өнер көрсеткен Жанар Дұғалова 225 ұпай жинады. Ол байқауда Ринат Зайытовтың сөзіне жазылған төл туындысы "Ізін көрем" әнін орындады.

Жанар жартылай финалдан соң үшінші орында тұрған болатын. Ол ақтық сайыста екінші орындағы Татарстан әншісінен 24 ұпай артық жинады.

Финалда әнші қыз көз жасына ерік беріп, қазақ елінің байрағын көкке көтерді.