Түрме қызметкерлері жазасын өтеуші науқас үшін қан тапсырды
ҚЫЗЫЛОРДА. ҚазАқпарат- Қызылорда облысы бойынша Қылмыстық-атқару жүйесі департаментіне қарасты ЗК-169/5 түзету мекемесінің ұжымы «Қан тапсыр да, ертеңгі күнге үміт сыйла» атты үндеумен Қызылорда облыстық қан тапсыру орталығына барып, қан тапсыру қайырымдылық акциясын өткізді.
Акцияға 20-ға жуық мекеме қызметкері қатысты. Іс-шара аталған мекемеде жаза мерзімін өтеп жатқан науқас, қанға мұқтаж болып отырған Бабыр Шакаримовке көмек қолын созу мақсатында ұйымдастырылды.
Адам бойындағы қайғыға ортақтасып, тілеулестік білдіріп, қолдарынан келгенше қол ұшын созу - әрбір дені сау адамның азаматтық парызы. Сондықтан, мекеме бастығы әділет майоры Т.Қалымбетов мұндай игі шара жыл сайын жалғасын тауып, дәстүрге айналатындығына сенім білдіріп, науқас Б.Шакаримовтың сауығып кетуіне тілектестігін білдірді.
