ТЖМ құтқарушылары орманды алапат өрттен қорғап қалды

ПЕТРОПАВЛ. KAZINFORM – Солтүстік Қазақстан облысының Есіл ауданында, Жаңалық ауылының маңында ашық аумақта құрғақ шөп жанып, кейін өрт Орман шаруашылығына тарады, деп хабарлайды ТЖМ баспасөз қызметі.

Алдын ала мәліметтер бойынша, өрттің аумағы 7,7 гектарды құраған. Өрт жермен жылдам тараған.

– Өртті сөндіру жұмыстары қатты, екпінді желдің салдарынан қиындады. Оқиға орнында штаб құрылып, өртті сөндіруге Төтенше жағдайлар департаментінің күштері мен құралдары, орман шаруашылығының қызметкерлері, жергілікті атқарушы органдардың өкілдері және ерікті өрт сөндіру жасақтары жұмылдырылды, – делінген министрліктің ресми мәліметінде.

Іс-қимылдарды үйлестіру мақсатында оқиға орнынан департаменттің дағдарыс орталығына бейнеконференцбайланыс ұйымдастырылды. Барлық қызметтердің үйлесімді жұмысының нәтижесінде өрт сөндірілді. Зардап шеккендер жоқ.

Айта кетейік, наурызда АҚШ-тың Небраска штатындағы орман өрті 324 мың гектар жерді шарпыды.

Ал Қазақстанда орман өртін ерте анықтау жүйесіне ЖИ технологиялары енгізіліп жатыр.