ҰБТ: 5 мыңға жуық түркістандық түлек 100-ден жоғары балл жинады

ТҮРКІСТАН. ҚазАқпарат - Түркістан облысында Ұлттық бірыңғай тестілеу басталған бес күнде емтиханды 20508 оқушы тапсырды. Ең жоғары 138 балды 3 оқушы, 137 балды 5 оқушы, 136 балды 9  оқушы жинады. Бұл туралы облыстық Білім басқармасынан мәлім етті, деп хабарлайды ҚазАқпарат.

4843 түлек 100-ден жоғары балл жинаған. Тестілеу бойынша облыстағы орташа балл - 79,4.

Айта кетейік, ҰБТ ережесін бұзған 4 оқушы аудиториядан шығарылып, олардың тестілеу нәтижелері жарамсыз деп танылды.

«Тестілеуге кіргізу кезінде ҰБТ талаптарының бұзылуы орын алған жоқ. Барлық бітірушілер металіздегіш аркадан өткізіліп, ұялы телефондары алынды», - деді ведомстводан.

2017-2018 оқу жылында Түркістан облысында 11-сыныпты 33765 оқушы бітірсе, оның 22417-сі ҰБТ тапсыруға өтініш білдірген.

26 маусым күні екі ауданда 48 мектептен 1317 бітіруші ҰБТ тапсыратын болады. Олар Мақтарал және Сарыағаш аудандары.