УЕФА чемпиондар лигасының «Астана»-«Марибор» матчына билеттер арзандатылып сатылмақ

АСТАНА. ҚазАқпарат - УЕФА чемпиондар лигасының «Астана»- «Марибор» жауап матчына билеттер 18 шілдеден сатыла бастайды, деп хабарланған «Астана» ФК сайтында.

Бұдан бұрын УЕФА чемпиондар лигасының «Астана»-«Марибор» матчына билеттер бағасы отыратын орын санатына байланысты болады деп жоспарланған. Солтүстік, Оңтүстік трибунаның бастапқы бағасы 500 теңге, Батыс, Шығыс жақ санатына қарай 1000-нен 3000 теңге дейін деп көзделген еді. Ел үшін матчтың маңыздылығын ескеріп, көп көрермен тарту мақсатында «Астана» футбол клубының басшылығы билет құнын арзандатуды шешті. Сонымен Солтүстік, Оңтүстік трибунаға билет 200 теңге, Батыс, Шығыс трибунаға санатына қарамастан 500 теңге тұрады. Билеттер «Астана» ФК кеңсесінде, «Астана Арена» кассаларында 18 шілдеден бастап сатыла бастайды. Еске сала кетейік, «Астана»- «Марибор» чемпиондар лигасының екінші біліктілік раундының жауап матчы 22 шілдеде өтеді, ол Астана уақыты бойынша сағат 20.00-де басталады.